Xhudistja nga Kosova, Loriana Kuka ka arritur të rrëmbej vetëm medaljen e argjendtë në Grand Prixin e Tel Avivit në Izrael në kategorinë deri në 78 kilogramë, pasi u mposht në finale nga sllovenia Klara Apotekar.

Sukseset e xhudistëve kosovar nuk kanë të ndalur dhe një i tillë ka ardhur edhe gjatë ditës së sotme (e shtunë).

Është xhudistja e re pejane, Loriana Kuka, e cila ka fituar medaljen e argjendtë në kategorinë e saj.

Loriana nuk pati fat pasi u mposht në finale nga sllovenia Klara Apotekar, pas disa vazhdimeve.

Xhudistja jonë e nisi ditën me triumf me Ippon kundër holandezes Ilona Lucassen në kategorinë deri në 78 kilogramë.

Loriana Kuka ka triumfuar edhe në çerekfinale përballë ruses Aleksandra Rabintseva dhe në këtë mënyrë është kualifikuar në gjysmëfinale të kësaj gare.

Në gjysmëfinale, Loriana u përball me Natalie Powel, e cila e përfaqëson Britaninë e Madhe dhe edhe këtu shënoi fitore pa problem.

Kujtojmë se para disa ditësh sukses në xhudo pati xhudistja Majlinda Kelmendi, e cila rrëmbeu medaljen e artë.

Majlinda Kelmendi arriti të stoliset me medaljen e artë në kategorinë deri në 52 kilogramë duke i fituar katër ndeshje me ippon. /Telegrafi/